ჩვენ მოვდივართ ქართული ფეხბურთიდან და მივდივართ ქართული ფეხბურთისკენ.

ფეხბურთის თამაში პატარა ეზოში, პატარა ბიჭებით იწყება. მერე ეს ბიჭები გაიზრდებიან, მთელი ქვეყნიდან საუკეთესოები შეიყრებიან და ბურთაობას დიდ მოედანზე აგრძელებენ.

გვინდა, რომ ამ ღირსეულ ადამიანებში ჩვენი სკოლის გაზრდილებიც მოხვდნენ და საქართველოს მომავალ გამარჯვებაში თავისი წვლილი შეიტანონ.

გვინდა, რომ დაგვიბრუნონ 18 ნოემბერი, 13 მაისი, ჩემპიონობის აღნიშვნის და თასების აწევის ულამაზესი ეპოქა.

"საბურთალო" უბნის გუნდია, მაგრამ ის საქართველოსთვის ჩამოყალიბდა. ჩვენ მოვდივართ ქართული ფეხბურთიდან და მივდივართ ქართული ფეხბურთისკენ. იმისკენ, რაც ჩვენი ხალხისთვის მხოლოდ სპორტის ერთი რიგითი სახეობა არასდროს ყოფილა.

საქართველოში ფეხბურთი თავისუფლების მოყვარული ერის საუკეთესო თვისებების წარმოჩენის ერთ-ერთი უპირველესი საშუალება იყო და არის.

მოვდივართ მდიდარი საფეხბურთო ისტორიიდან და გვსურს, მომავალში კიდევ უფრო დიდი ისტორიის თანამონაწილენი გავხდეთ.

ჩვენ საქართველოსთვის, ხალხისთვის, მისი ღირსებისა და სიხარულისთვის უნდა ვითამაშოთ!

და ეს სულაც არაა უბრალო თამაში.